ភ្នំពេញ៖ នារសៀល ថ្ងៃពុធ ទី២៧ ខែសីហា ឆ្នាំ២០២៥ ឯកឧត្តម ឧត្តមអគ្គានុរក្ស.១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ បានអញ្ជើញសំណេះសំណាល ជាមួយសិក្ខាកាមទាំង១០រូប ដែលទើបបញ្ចប់វគ្គបណ្ដុះបណ្ដាលបឋមមន្ត្រី ជំនាន់ទី២០ វគ្គទី១ (រយៈពេល ៤ខែ) នៅសាលាបណ្ឌិត្យសភានគរបាលកម្ពុជា។
ឆ្លៀតក្នុងឱកាសនោះដែរ ឯកឧត្តមប្រធាន បានមានប្រសាសន៍ថា៖ ការបញ្ជូនមន្ត្រីទៅចូលរួមវគ្គបណ្ដុះបណ្ដាលនាពេលកន្លងមក គោលបំណងដើម្បីពង្រឹងសមត្ថភាព លើកកម្ពស់ចំណេះ ជំនាញ ស្វែងយល់បន្ថែម និងមានសារៈសំខាន់ក្នុងការពង្រឹងធនធានមនុស្សរបស់មណ្ឌលអប់រំកែប្រែទី១ ក៏ដូចជាអគ្គនាយកដ្ឋានពន្ធនាគារ ហើយអ្នកដែលបានឆ្លងកាត់វគ្គបណ្ដុះបណ្តលនេះ សុទ្ធសឹងជាមន្ត្រីដែលមានសក្តានុពល ដែលមណ្ឌលបានផ្ដល់សេចក្តីទុកចិត្ត និងការរំពឹងទុក្ខ នូវលទ្ធផលជាវិជ្ជមាន របស់សិក្ខាកាមទាំង ១០រូប។
បន្ថែមពីលើនោះ ឯកឧត្តមប្រធាន សង្ឃឹមថាសិក្ខាកាមទាំងអស់ និងយកចំណេះជំនាញ បទពិសោធន៍បន្ថែម មកបំពេញការងារឲ្យបានល្អប្រសើរថែមមួយកម្រិតទៀត និងជួយបង្ហាត់បង្ហាញទៅដល់មន្ត្រីដែលពុំទាន់បានឆ្លងកាត់វគ្គសិក្សាផងដែរ។
ក្រៅពីនោះ ឯកឧត្តមប្រធាន ក៏បានមានប្រសាសន៍ណែនាំ ឱ្យសិក្ខាកាមទាំង ១០ រូប ត្រូវចេះស្រឡាញ់គ្នា សាមគ្គីគ្នាឱ្យបានល្អ និងត្រូវមានចក្ខុវិស័យវែងឆ្ងាយ ខិតខំបំពេញការងារ និងសង្ឃឹមថាអ្វីដែលអ្នកបានសិក្សា យកមកអនុវត្តក្នុងការងារនឹងទទួលបានលទ្ធផលល្អ និងអនាគតល្អនៅថ្ងៃខាងមុខ។
ជាទីបញ្ចប់ ឯកឧត្តមប្រធាន បានឧបត្ថម្ភថវិការ ក្នុង១នាក់ ៣០ម៉ឺនរៀល និងសូមជូនពរឱ្យសិក្ខាកាមទាំងអស់ ជួបតែសេចក្តីសុខ សេចក្តីចម្រើន ជោគជ័យក្នុងភារកិច្ច ក្រោយត្រឡប់ចូលបម្រើការងារវិញ ៕
