ភ្នំពេញ៖ នាព្រឹកថ្ងៃព្រហស្បតិ៍ ៨កើត ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣ ខែកក្កដា ឆ្នាំ២០២៥ ឯកឧត្តមបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង អមដំណើរដោយក្រុមការងារចុះមូលដ្ឋានស្រុកកំពង់ត្រឡាច រដ្ឋបាលឃុំកំពង់ត្រឡាច និងឃុំច្រេស បានអញ្ជើញជួបសំណេះសំណាល និងសួរសុខទុក្ខប្រជាពលរដ្ឋ ដែលទើបមកពីប្រទេសថៃចំនួន ៥នាក់ ស្ថិតនៅឃុំកំពង់ត្រឡាចចំនួន ១នាក់ និងនៅឃុំច្រេសចំនួន ៤នាក់។
ក្នុងឱកាសនោះ ឯកឧត្តមបណ្ឌិត បានមានប្រសាសន៍ថ្លែងអំណរគុណដល់បងប្អូនប្រជាពលរដ្ឋដែលទើបមកពីប្រទេសថៃទាំងអស់ ដោយហ៊ានសម្រេចចិត្តមកស្រុកកំណើតវិញដេីម្បីស្វែងរកការងារធ្វើនៅក្នុងស្រុក។ នេះជាការបង្ហាញពីទឹកចិត្តរបស់បងប្អូនជឿជាក់មកលើការដឹកនាំរបស់រាជរដ្ឋាភិបាលកម្ពុជា ដែលកំពុងបង្កើតឱកាសការងារយ៉ាងច្រើនជូនប្រជាពលរដ្ឋបានការងារធ្វើកុំឱ្យមានការចំណាកស្រុកតទៅទៀត។
ឯកឧត្ដមបណ្ឌិត ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវប្រញាប់ប្រញាល់ស្វែងរកការងារក្នុងស្រុករបស់យើង ពីព្រោះជាពិសេសឱកាសការងារក្នុងស្រុកកំពង់ត្រឡាចមានច្រើនកន្លែងតាមបណ្ដារោងចក្រកាត់ដេរ។ តាមរយៈការសាកសួរពីបងប្អូនដែលបានទៅប្រទេសថៃ ចំពោះប្រាក់ខែដែលធ្វើការនៅប្រទេសថៃ គឺមិនសូវលើសប្រាក់ខែនៅស្រុកយើងប៉ុន្មានទេ។ ម្យ៉ាងវិញទៀត ធ្វើការនៅស្រុកយើងបានជួបជុំបងប្អូន និងមានពេលវេលាសម្រាប់ធ្វើការងារផ្ទះ ឬក៏អាចប្រកបមុខរបរដាំដុះ និងចិញ្ចឹមសត្វបន្ទាប់បន្សំសម្រាប់ផ្គត់ផ្គង់ដល់ជីវភាពគ្រួសារបន្ថែមទៀតផងដែរ។ ក្នុងឱកាសនោះ ឯកឧត្តមបណ្ឌិត បានឧបត្ថម្ភថវិកាមួយចំនួនដល់បងប្អូនប្រជាពលរដ្ឋទាំង ៥នាក់នោះ ៕
